Carmen nuptiale - Carm. 61, v. 1-15, 41-50
Metrum: strophe Glyconia pentacolon
Collis ō Helicōniī
cultor, Ūraniae genus,
quī rapis teneram ad virum
virginem, ō | Hymenaee Hymēn,
ō | Hymēn Hymenaee;
cinge tempora flōribus
suāve olentis amāracī,
flammeum cape, laetus hūc,
hūc venī niveō gerēns
lūteum pede soccum,
excitusque hilarī diē
nūptiālia concinēns
vōce carmina tinnulā
pelle humum pedibus, manū
pīneam quate taedam! […]
ut lubentius, audiēns
sē citārier ad suum
mūnus, hūc aditum ferat
dux bonae Veneris, bonī
coniugātor amōris.
quis deus magis anxiīs
est petendus amantibus?
quem colent hominēs magis
caelitum? Ō | Hymenaee Hymēn,
ō | Hymēn Hymenaee.