Carmen 63
Metrum: versus Galliambicus
Super alta vectus Attis celerī rate maria,
Phrygium ut nemus citātō cupidē pede tetigit,
adiitque opāca silvīs redimīta loca deae,
stimulātus ibi furentī rabiē, vagus animī,
dēvolsit īlī acūtā sibi pondera silice!
Itaque ut relicta sēnsit sibi membra sine virō
etiam recente terrae sola sanguine maculāns,
niveīs citāta cēpit manibus leve typanum.
Typanum, tubam, Cybellē, tua, māter, initia,
quatiēnsque terga taurī tenerīs cava digitīs
canere haec suīs adorta est tremebunda comitibus:
„Agite īte ad alta, Gallae, Cybelēs nemora simul!
Simul īte, Dindymēnae dominae vaga pecora,
aliēna quae petentēs velut exsulēs loca
sectam meam exsecūtae, duce mē, mihi comitēs
rapidum salum tulistis truculentaque pelagī,
et corpus ēvirāstis Veneris nimiō odiō;
hilarāte erae citātīs errōribus animum!
Mora tarda mente cēdat: simul īte, sequiminī
Phrygiam ad domum Cybellēs, Phrygia ad nemora deae,
ubi cymbalum sonat vōx, ubi tympana reboant,
tībīcen ubi canit Phryx curvō grave calamō,
ubi capita Maenadēs vī iaciunt hederigerae,
ubi sacra sancta acutīs ululātibus agitant,
ubi suēvit illa dīvae volitāre vaga cohors,
quō nōs decet citātīs celerāre tripudiīs.”