Ad Melpomenen
Metrum: Asclepiadium systema I
Exēgī monumentum aere perennius
rēgālīque sitū pȳramidum altius,
quod nōn imber edāx, nōn Aquilō impotēns
possit dīruere aut innumerābilis
annōrum seriēs et fuga temporum.
Nōn omnis moriar multaque pars meī
vītābit Libitīnam; ūsque ego posterā
crēscam laude recēns, dum Capitōlium
scandet cum tacitā virgine pontifex.
Dīcar, quā violēns obstrepit Aufidus
et quā pauper aquae Daunus agrestium
rēgnāvit populōrum, ex humilī potēns
prīnceps Aeolium carmen ad Ītalōs
dēdūxisse modōs. Sūme superbiam
quaesītam meritīs et mihi Delphicā
laurō cinge volēns, Melpomenē, comam.