Ad Vergilium - Carm. IV. 12
Metrum: Asclepiadium systema II
Iam vēris comitēs, quae mare temperant,
inpellunt animae lintea Thrāciae,
iam nec prāta rigent nec fluviī strepunt
hībernā nive turgidī.
Nīdum pōnit Ityn flēbiliter gemēns
īnfēlīx avis et Cecropiae domūs
aeternum opprobrium, quod male barbarās
rēgum est ulta libīdinēs.
Dīcunt in tenerō grāmine pinguium
cūstōdēs ovium carmina fistulā
dēlectantque deum, cui pecus et nigrī
collēs Arcadiae placent.
Addūxēre sitim tempora, Vergilī.
Sed pressum Calibus dūcere Līberum
sī gestīs, iuvenum nōbilium cliēns,
nardō vīna merēbere.
Nardī parvus onyx ēliciet cadum,
quī nunc Sulpiciīs accubat horreīs,
spēs dōnāre novās largus amāraque
cūrārum ēluere efficāx.
Ad quae sī properās gaudia, cum tuā
vēlōx merce venī: nōn ego tē meīs
immūnem meditor tinguere pōculīs,
plēnā dīves ut in domō.
Vērum pōne morās et studium lucrī,
nigrōrumque memor, dum licet, ignium
miscē stultitiam cōnsiliīs brevem:
dulce est dēsipere in locō.