Ad fontem Bandusiae
Metrum: Asclepiadium systema III
Ō fōns Bandusiae, splendidior vitrō,
dulcī digne merō nōn sine flōribus,
crās dōnāberis haedō,
cui frōns turgida cornibus
prīmīs et Venerem et proelia dēstinat:
frūstrā, nam gelidōs īnficiet tibi
rubrō sanguine rīvōs
lascīvī subolēs gregis.
Tē flagrantis atrōx hōra Canīculae
nescit tangere, tū frīgus amābile
fessīs vōmere taurīs
praebēs et pecorī vagō.
Fīēs nōbilium tū quoque fontium
mē dīcente cavīs impositam īlicem
saxīs, unde loquācēs
lymphae dēsiliunt tuae.