Ad Chloen
Metrum: Asclepiadium systema III
Vītās hinnuleō mē similis, Chloē,
quaerentī pavidam montibus āviīs
mātrem nōn sine vānō
aurārum et siluae metū.
Nam seu mōbilibus vepris inhorruit
ad ventōs foliīs, seu viridēs rubum
dīmōvēre lacertae,
et corde et genibus tremit.
Atquī nōn ego tē tigris ut aspera
Gaetūlusve leō frangere persequor:
tandem dēsine mātrem
tempestīva sequī virō.