Ad Neobulen
Metrum: Ionicum systema (a minore)
Miserārum est neque amōrī dare lūdum neque dulcī
mala vīnō lavere aut exanimārī
metuentēs patruae verbera linguae.
Tibi quālum Cytherēae puer āles, tibi tēlās
operōsaeque Minervae studium aufert,
Neobūlē, Liparaeī nitor Hebrī,
simul ūnctōs Tiberīnīs umerōs lāvit in undīs;
eques ipsō melior Bellerophontē,
neque pugnō neque segnī pede victus;
catus īdem per apertum fugientēs agitātō
grege cervōs iaculārī et celer artō
latitantem fruticētō excipere aprum.